#updates

Peter Tscherkassky, Joan Fontcuberta e Laura Huertas Millán, primeiros nomes de Curtocircuíto 2019

Novas

Peter Tscherkassky será o protagonista da retrospectiva principal, a Joan Fontcuberta concederémoslle unha Carta Branca ademais de impartir unha clase maxistral e Laura Huertas Millán protagonizará a sección Púlsar, na que en cada edición destacamos o traballo de cineastas novas

Coming attractions (Peter Tscherkassky, 2010)

Desde o Festival Internacional de Cine de Santiago de Compostela anunciamos hoxe os primeiros nomes da nosa 16ª edición, que se celebrará entre o 28 de setembro e o 6 de outubro. Trátase do cineasta e teórico austríaco Peter Tscherkassky, a quen lle dedicaremos unha retrospectiva; do fotógrafo e ensaísta Joan Fontcuberta, a quen convidamos a presentar unha Carta Branca e a dar unha clase maxistral; e da artista e cineasta franco-colombiana Laura Huertas Millán, que protagonizará a sección Púlsar. En Curtocircuíto continuamos coa nosa aposta por traer a Galicia grandes nomes ao lado de novas figuras do cinema e a cultura visual contemporáneas, nun programa sempre comprometido coa calidade artística, as últimas tendencias cinematográficas e a interdisciplinariedade. 

Peter Tscherkassky (Viena, 1958) é un dos grandes do cinema de vangarda que, ademais de acumular unha ampla e potente filmografía, ten un extenso traballo ensaístico sobre a historia e teoría do cinema. En 1979 comezou a realizar películas en Super 8. En 1991 fundou a recoñecida distribuidora Sixpackfilm (unha das nosas colaboradoras) con Brigitta Burger-Utzer. E en todos estes anos, realizou case unha trintena de películas, entre as que se atopan Trilogy of CinemaScope (1997-2001) –formada polos filmes L'arrivée, Outer Space e Dream Work–, Instructions for a Light and Sound Machine (2005), Coming Attractions (2010) e The Exquisite Corpus (2015), que formarán parte da selección que proxectaremos en Curtocircuíto. Peter, recibiu preto de cincuenta premios, incluíndo o Golden Gate Award (San Francisco), o Gran Premio da Internationale Kurzfilmtage Oberhausen (Alemaña) e o Premio á Mellor Curtametraxe do Festival Internacional de Cine de Venecia.

Desde Curtocircuíto queremos ofrecervos a oportunidade de gozar en pantalla grande dunha das filmografías máis controvertidas, elocuentes e transgresoras do cinema actual. A súa técnica de traballo artesanal co celuloide desafía toda convención, movéndose entre a ruptura da linguaxe e a creación dun universo visual cunha forte carga erótica e sexual. Todas as pezas desta retrospectiva serán proxectadas en celuloide.

Joan Fontcuberta (Joan Fontcuberta)

Nesa transgresión dos valores tradicionais da imaxe habita tamén o fotógrafo e ensaísta Joan Fontcuberta (Barcelona, 1955), a quen concedemos unha Carta Branca. O catalán, desenvolveu unha actividade plural no mundo da fotografía como creador, docente, crítico, comisario e historiador. Nun momento histórico no que as imaxes son un dos alicerces da sociedade, Fontcuberta eríxese como a figura clave na análise dese capitalismo visual. O seu traballo como ensaísta reflíctese na súa fotografía, onde reflexiona sobre a creación de novas realidades e non tanto sobre a representación da mesma. Sempre buscando a subversión e a visión crítica, Fontcuberta, que se move con soltura no campo do fake, é un dos teóricos detrás do concepto postfotografía.

É autor dunha ducia de publicacións, como El beso de Judas. Fotografía y Verdad (1997), Ciencia y Fricción (1998), La cámara de Pandora (2010) e La furia de las imágenes (2016). A súa obra foi exposta no MoMA de Nova Iorque, o Art Institute de Chicago, na Maison Européenne da Photographie de París ou no Science Museum de Londres. 

Aequador (Laura Huertas Millán, 2012)Aequador (Laura Huertas Millán, 2012)

Continuando con esta subversión da realidade, a sección Púlsar, coa que en cada edición poñemos en valor a cineastas novos, estará dedicada este ano ao traballo de Laura Huertas Millán (1983), artista e cineasta franco-colombiana cuxa práctica cinematográfica parte da etnografía para desembocar nunha sorte de ciencia ficción mesturada con fantasía e falso documental. Foi investigadora asociada do Sensory Ethnography Lab (2014) e do Film Study Center (2014-2017), ambos da Universidade de Harvard, e, entre 2009 e 2012, desenvolveu unha serie de pezas ao redor do exotismo vinculado aos grandes relatos de conquistadores e viaxeiros, entre as cales se atopan Journey to a land otherwise unknown (2011) e Aequador (2012), rodadas entre xardíns botánicos europeos e a Amazonía colombiana, e que combinan fantasía, ciencia ficción e falso documental, para desenterrar representacións coloniais e desmontar as súas proxeccións de poder. En 2012 comezou unha serie sobre ‘ficcións etnográficas’, onde se enmarcan os seus filmes Sol Negro (2016), La Libertad (2017), jeny303 (2018) e The Labyrinth (2018). As súas pezas recibiron premios en festivais como FIDMarseille, Doclisboa, Frontera Film Festival, o festival de documentais de Bogotá (MIDBO), Videobrasil e a Bienal de la Imagen en Movimiento en Bos Aires.

O cinema de Huertas Millán corrobora a desaparición das fronteiras tradicionais entre documental e ficción. Empregando ferramentas dos dous campos, Laura constrúe relatos que afondan nas nosas raíces culturais e na nosa forma de entender o mundo. A sección Púlsar revisará a obra completa desta cineasta, nun dos primeiros focos que se realizan en España sobre o seu traballo. 

Na nosa 16ª edición, desde Curtocircuíto seguimos afondando na ruptura do formato clásico dos eventos cinematográficos propoñendo contidos interdisciplinarios, mantendo como eixo principal o cinema de vocación artística e a aposta polas linguaxes contemporáneas. Ademais das proxeccións, Curtocircuíto ofrecerá tamén espectáculos audiovisuais, propostas formativas e diversas performances en distintos espazos da cidade.

O Festival Internacional de Cine de Santiago de Compostela, que desvelará máis contidos da súa programación nas próximas semanas, está organizado polo Concello de Santiago, e financiado, entre outros, pola Deputación da Coruña, a AGADIC e o ICAA.